鴨卵伯仔
鴨卵伯仔賣鴨卵,
一二三四袂曉算,
人客欲買五粒卵,
較算攏是-
一二一二...。
|
西西西
西西西,矮仔冬瓜,
斟燒酒,來乾杯,
咕嚕 咕嚕 咕嚕-空叭切。
|
水雞仔囝
水雞仔囝,
出世肚大大,
喙闊闊,
田中央起厝蹛。
水雞仔囝,
無人教,
家己會唱歌。
|
虯頭鬃
阿母的球頭鬃,
親像米粉芳芳芳。
阿爸的虯頭鬃,
親像獅仔真驚人。
|
好厝邊
阿伯阿姆門口過,
趕緊行禮擱講話,
有閒請來阮兜坐,
做伙開講佮泡茶。
|
一隻猴仔
一隻猴仔帶一陣猴仔去溝仔,
一隻猴仔踣落溝仔,
一隻猴仔轉去提鉤仔來鉤猴仔。
|
四四方
四四角角一張臺,
年年讀冊我嘛來。
你讀三年毋捌字,
我讀三年得秀才。
|
大樹公
大樹公,長喙鬚,
厝角鳥仔來做岫,
樹仔跤,
囝仔兄咧拍球,
阿公行棋、捻喙鬚。
|
宜蘭木屐
宜蘭出木屐,
囝仔穿木屐,
ㄎ一ㄎ一ㄎ一ㄚㄎ一ㄚㄎ一ㄎ一ㄎ一ㄚ,
行向東,心情真輕鬆;
行向西,笑共喙仔裂腮腮。
|
老公仔佇菜園
老公仔佇菜園,菜園掘鬆鬆,
掘啊掘,欲種蔥;
蔥無芽,欲種茶;
茶無花,欲種瓜;
瓜無籽,掠鳥鼠,
鳥鼠匿佇佗?
匿佇芎蕉跤。
哈哈哈,哈哈哈。
|
白翎鷥
白翎鷥,
腳骨真細枝,
不怕溪水冷吱吱,
抓到魚仔笑瞇瞇。
|
講好話
講好話,我上敖:
食菜頭,
予咱逐工好彩頭;
食王梨,
予咱規年旺旺來。
|